O venres 26 de maio, ás 20 horas, nos locais parroquiais do Corazón de María, a delegación episcopal de Apostolado Segrar e o Consello Diocesano de Laico da diocese de Tui-Vigo, organizan a conferencia «Cristiáns perseguidos hoxe» a cargo de Carlos Tortosa, responsable en Galicia do movemento Axuda á Igrexa Necesitada. Durante a conferencia, mostrarase un cáliz tiroteado e profanado por yihadistas do Daesh, durante a ocupación de Qaraqosh .
Esta actividade enmárcase dentro da XL Semana de Apostolado Seglar que, baixo o lema «Xuntos anunciamos o que vivimos», busca visibilizar a riqueza da diversidade que habita na realidade eclesial da diocese tudense e, tamén, celebrar a Xornada da Acción Católica e o Apostolado Segrar que a Igrexa celebra cada ano xunto coa solemnidade de Pentecostes —este ano coincide o domingo 28 de maio—.
Sobre o cáliz
O cáliz foi rescatado polo sacerdote Salgar entre os entullos do templo cerco católico de Qaraqosh —cidade situada no norte de Iraq, na rexión da Chaira de Nínive—. Nel, pódense observar as consecuencias do bombardeo do templo e as desfeitas producidas por unha bala que o atravesou nun tiroteo especificamente dirixido aos obxectos litúrxicos.
Qaraqosh é o pobo de maioría cristiá máis grande de Iraq e posiblemente da rexión, con 50.000 habitantes, case todos eles cristiáns: católicos caldeos, sirio-católicos, e sirio-ortodoxos. Jesús Rodríguez Torrente, que foi asistente eclesiástico de Axuda á Igrexa Necesitada en España, destaca que o cáliz, «con esta desfeita, é como o Corazón de Xesús que volve derramar o seu sangue día a día por cada un de nós, converténdoo así en símbolo de entrega e de Amor de Deus. Xa non é un obxecto de dor e odio, senón todo o contrario».
Perseguidos e exiliados
A maioría cristiá desta zona de Iraq supuxo o primeiro obxectivo dos terroristas do Daesh ao invadir Mosul e as poboacións de maioría cristiá da Chaira de Nínive no verán de 2014. 120.000 cristiáns, nenos, adultos, anciáns, familias enteiras tiveron que fuxir en cuestión de horas. A maioría deles dirixíronse a Erbil , capital do Kurdistán iraquí. Ata que puideron regresar ao que quedaba dos seus fogares, viviron grazas á caridade da Igrexa. Axuda á Igrexa Necesitada (ACN) axudoulles con 34,5 millóns de euros para aloxamento, alimentos e bens de primeira necesidade.
Despois de catro anos da ocupación yihadista, Mosul e as poboacións da chaira de Nínive quedaron libres e comezou a reconstrución. As tres grandes Igrexas de Iraq asinaron un acordo con Axuda á Igrexa Necesitada para traballar na reconstrución destas poboacións. Un proxecto que conta co apoio expreso do papa Francisco, quen lembra, constantemente en audiencias e discursos, a realidade dos cristiáns perseguidos e a necesidade de axudarlles e orar por eles.
Sobre Axuda á Igrexa Necesitada
Axuda á Igrexa Necesitada (ACN), é unha fundación pontificia que serve á Igrexa católica desde 1947 no seu labor evanxelizador en todo o mundo, prioritariamente nas comunidades máis necesitadas, discriminadas e perseguidas.
Traballamos en 139 países de necesidade e persecución relixiosa, a través de 6000 proxectos, grazas á xenerosidade dos nosos benfeitores. En España, impulsamos campañas de información, oración e caridade.
