Na mañá do venres 19 de xullo, véspera da ordenación episcopal e toma de posesión de quen será novo bispo de Tui-Vigo, D. Antonio Valín Valdés realizou, como está prescrito, o xuramento de fidelidade e a proclamación da súa fe nun acto que tivo lugar na curia diocesana, ante o vicario Xeneral, Juan Martínez Lorenzo, o vigairo de Pastoral, José Vidal Novoa, chanceler-secretario, Manuel Lage Lorenzo, e membros do Colexio de Consultores: Juan Andión Marán, José Diéguez Dieppa, Guillermo C. Juan Morado, José Alberto Montes Rajoy, Santiago Pérez Bouzada e Manuel Salcidos González.
Este é un dos pasos previstos antes de que D. Antonio Valín sexa ordenado bispo, mañá 20 de xullo, ás 11.00 horas, na catedral de Tui. Trátase dun acto moi sinxelo, pero á vez moi transcendente, no que o bispo electo proclama a súa fe, mostra o seu compromiso de cumprir coas obrigacións do ministerio episcopal, e xura fidelidade á Igrexa e á tradición apostólica, mostrando a comuñón plena co Santo Padre e o resto de bispos .
