Do 15 ao 18 de setembro, as delegacións para o Clero de Galicia organizan a XXX edición do Encontro de Formación Permanente do Clero no mosteiro de San Xoán de Poio. Baixo o lema «Sacerdote, orante, fonte de comuñón», os diferentes relatores tratarán de profundar na importancia da oración na vida do presbítero.
Aínda que o domingo levará a cabo a acollida dos sacerdotes no mosteiro benedictino, os relatorios darán comezo ao día seguinte, luns 16 de setembro. O sacerdote de Sigüenza-Guadalaxara, teólogo e capelán do mosteiro cisterciense de Buenafuente do Sistal, Anxo Moreno Sancho, impartirá dúas charlas durante a mañá: ás 11.00 horas, «A oración de Xesús, modelo de oración dos discípulos misioneiros»; e ás 12.45 horas, «A Igrexa, construtora do ben común».
Pola tarde do luns, tomaralle a substitución o catedrático da facultade de Ciencias da Información da Universidade Complutense de Madrid, Arturo Gómez Quijano, con dous relatorios sobre o ámbito da comunicación: «Claves de comunicación persuasiva» (16.30 horas) e «Comunicando o Evanxeo» (18.00 horas).
A comunidade de mosteiro cisterciense de Armenteira será a encargada de dirixir a conferencia «Lectio Divina», que dará comezo ás 10.30 horas, o martes 17. A continuación, realizarán un taller sobre este método de oración coa Palabra de Deus. Pola tarde, os sacerdotes gozarán dunha excursión a Cambados, seguida do rezo de Vésperas coa comunidade da Armenteira.
Os dous últimos relatorios do mércores 18 serán impartidos por Florentino Pérez Vaquero, secretario técnico da Subcomisión para os Seminarios da Conferencia Episcopal Española: «Ministerio orante: A oración na vida do sacerdote» é o titulo da primeira que comezará ás 10.30 horas, seguida do relatorio «A Liturxia das Horas». O encontro finalizará con dúas intervencións: a primeira do Sínodo dos Bispos «Por unha Igrexa sinodal: comuñón, participación e misión», a cargo do delegado para o Clero de Mondoñedo-Ferrol, Antonio Basanta; e a segunda sobre o Ano Xubilar que se celebrará en Roma en 2025, da que se encargará o delegado de Santiago de Compostela para o Xubileu, Santiago Romero.
