28 de Maio de 2024

,

San Germán de París
28 de Maio de 2024

,

San Germán de París

As dioceses de Galicia presentan a «Memoria Económica e de Actividades» do 2022

As dioceses de Galicia presentan a «Memoria Económica e de Actividades» do 2022
FOTO.- Los obispos de Galicia durante el acto de presentación de la «Memoria Económica y de Actividades de la Iglesia en Galicia»

Hoxe, ás 11.00 horas, no Hotel Oca – Porta do Camiño, en Santiago de Compostela, por primeira vez, as cinco dioceses da provincia eclesiástica de Santiago de Compostela —Lugo, Ourense, Mondoñedo-Ferrol, Santiago e Tui-Vigo— presentaron a «Memoria Económica e de Actividades da Igrexa en Galicia», correspondente ao ano 2022. Ao acto asistiron, ademais dos prelados da provincia eclesiástica —Mons. Francisco José Prieto, de Compostela; Mons. Fernando Cadiñanos, de Mondoñedo-Ferrol; Mons. Alfonso Carrasco, de Lugo; Mons. Leonardo Lemos, de Ourense; e Mons. Luís Quinteiro, de Tui-Vigo—, numerosas autoridades eclesiais e civís, así como profesionais dos medios de comunicación de Galicia.

Esta presentación é froito do traballo conxunto das cinco dioceses galegas que, nun exercicio de transparencia, quixeron dar conta do labor que a Igrexa católica desenvolveu na comunidade autónoma, durante o ano 2022. Ao mesmo tempo, os bispos poñen en valor o tempo, as calidades, a oración e o apoio económico de todas esas persoas que contribúen ao desenvolvemento do labor da Igrexa en Galicia; nesta liña, na mensaxe introdutoria á «Memoria Económica e de Actividades» expresan o seu agradecemento «por esa historia de fe na nosa terra, que fixo posible tanta vida e xerou tanta esperanza ao noso arredor. E damos grazas tamén a tantas persoas concretas que fixeron vida a súa fe».

Sonia, Eva, Pablo, Yomira, Maite e Josetxo son os rostros do conglomerado de cifras que vertebran a acción da Igrexa en Galicia. Sonia, relixiosa mercedaria e mestra no colexio do Sagrado Corazón en Ferrol, é unha das 3.289 docentes que, durante o ano 2022, acompañou e formou a 50.856 alumnos nos 180 centros católicos concertados da comunidade autónoma.

Grazas a Cáritas na arquidiocese de Santiago, Yomira puido atopar un emprego, despois de emigrar desde Uruguai no medio da pandemia da Covid-19. Cáritas, a institución que desenvolve a acción caritativa e asistencial da Igrexa en Galicia, atendeu a 71.808 persoas, grazas ao labor dos profesionais contratados e a 4.645 voluntarios.  Este labor é tamén apoiado por 439 centros para mitigar a pobreza; 88 casas para anciáns, enfermos crónicos e persoas con discapacidade; 27 centros de menores e mocidade e outros centros para a tutela da infancia; 6 centros de rehabilitación para drogodependentes; 9 centros para a defensa da vida; 7 centros para a promoción da muller e vítimas de violencia; e 17 centros para promover o traballo.

En total, 1.200 sacerdotes exercen o seu ministerio nas 3.644 parroquias da provincia eclesiástica de Compostela; exemplo diso é Pablo, sacerdote da diocese de Ourense, que, formando equipo con outro presbítero, está a cargo da cura pastoral dunha Unidade de Atención  Parroquial na zona do Ribeiro. Xunto aos sacerdotes que se encargan de administrar os sacramentos, 3.486 catequistas acompañan a nenos e mozos no seu proceso de formación para recibir os tres sacramentos de iniciación cristiá —Bautismo, Comuñón e Confirmación—. Durante o ano 2022, celebráronse en Galicia: 8.756 bautizos, 4.980 confirmacións e 10.055 primeiras comuñóns.

Hai máis de 20 anos, Maite e Josetxo responderon “si” á vocación matrimonial; unha vocación que, a pesar das dificultades, consolidouse grazas á Igrexa, que lles ofreceu unha rede de lazos  e unha comunidade que os sostén e os anima a camiñar sempre cara ao futuro. Agora eles son axentes de pastoral que acompañan a outros matrimonios novos que deciden comprometerse para toda a vida. En total, no ano 2022, celebráronse en Galicia 1.429 vodas católicas.

A piedade popular é outra forma de manifestar a fe en Xesucristo. A comunidade galega conta con 38 celebracións e festas relixiosas de interese turístico rexional e nacional. Desde o pasado ano 2023, o santuario de O Corpiño na diocese de Lugo celebra o Ano Xubilar. Eva, como membro da confraría da Virxe de O Corpiño, vela polo coidado da piedade popular como instrumento de evanxelización, desde o santuario lalinense.

Durante máis de dous mil anos, a Igrexa en Galicia transmitiu a mensaxe de Xesucristo nesta pequena porción de terra, transformando a vida de millóns de persoas a través de accións pastorais, evanxelizadoras, celebrativas, asistenciais, educativas e culturais. Cada xesto e cada acción falan da xenerosidade e entrega que os cristiáns de Galicia viven como don e tarefa. Xa que logo, mediante este acto de presentación da «Memoria Económica e de Actividades da Igrexa en Galicia» do ano 2022, os bispos da provincia eclesiástica agradecen a contribución de todas as persoas que senten a Igrexa como a súa propia familia, á vez que solicitan «o necesario compromiso para que, corresponsablemente, levemos adiante a misión que nos foi confiada ao servizo dos homes, os nosos irmáns».

Facebook
Twitter
Email
WhatsApp