3 de Marzo de 2024

,

Santos Emeterio y Celedonio
3 de Marzo de 2024

,

Santos Emeterio y Celedonio

Máis dun centenar de mozos e mozas participará na JMJ coa diocese de Tui-Vigo

Máis dun centenar de mozos e mozas participará na JMJ coa diocese de Tui-Vigo

A delegación de Pastoral Xuvenil e Universitaria da diocese de Tui-Vigo organizou a viaxe á Xornada Mundial da Mocidade na que participarán 94 mozos e mozas de distintas realidades da diocese de Tui-Vigo —parroquias como o Divino Salvador de Soutomaior ou o Inmaculado Corazón de María de Vigo, o Seminario Menor de Tui ou colexios como Compañía de María, entre outros—e  43 mozos do colexio San Xosé de Cluny de Pozuelo, en Madrid, que se unen a este encontro co papa Francisco na cidade portuguesa de Lisboa. En total 137 mozos de idades comprendidas entre os 14 e os 30 anos viaxarán á JMJ, acompañados por relixiosas, sacerdotes e o bispo de Tui-Vigo, Mons. Luís Quinteiro.

A Xornada Mundial da Mocidade, que se celebra do 31 de xullo ao 6 de agosto, é un encontro de mozos de todo o mundo que se reúnen co papa Francisco para celebrar a súa fe en Xesucristo. É ademais unha peregrinación, unha festa da mocidade, unha expresión da Igrexa universal e un momento forte de evanxelización do mundo xuvenil.

Os actos centrais destas xornadas coinciden coa chegada do papa Francisco a Lisboa o día 3 de agosto co acto de acollida no «Outeiro do Encontro» —Parque Eduardo VII—. O papa Francisco presidirá o 4 de agosto o Vía Crucis, tamén no «Outeiro do Encontro»; o 5 de agosto, terá lugar a Vixilia e, o 6 de agosto, a Misa de Envío no «Campo dá Graça» —Parque Tezo—.

Ao longo de toda a semana, pola mañá terán lugar as catequeses «Rise Up» impartidas por bispos e mozos de todo o mundo, pola tarde o «Festival da Mocidade» con máis de 500 eventos programados e, durante todo o día, será posible visitar a Cidade da Alegría co Parque do Perdón, onde será posible recibir o sacramento da Reconciliación e acudir á Feira Vocacional. Todo iso será posible grazas a preto de 30.000 voluntarios —1.000 procedentes de España— que asistirán á JMJ.

Con anterioridade, e como preparación a estas xornadas, do día 26 ao 31 de xullo o grupo diocesano participará nos «Días na diocese» na cidade de Faro, diocese de Algarve, xunto con outros 7.000 peregrinos chegados de distintos puntos do mundo. É unha oportunidade para coñecer a diocese de Algarve, distintos aspectos da vida diocesana, atoparse con diversas culturas, celebrar e festexar.

Finalizada a Xornada Mundial da Mocidade en Lisboa, os días 7 e 8 de agosto, terá lugar en Coimbra un encontro con todos os peregrinos das cinco dioceses da provincia eclesiástica de Santiago de Compostela —que engloba a arquidiocese compostelá e as dioceses de Mondoñedo-Ferrol, Tui-Vigo, Lugo e Ourense—, o que supón compartir a alegría da fe con aproximadamente 400 mozos e mozas galegos. 

FOTO: Encontro pre-JMJ organizado polas delegacións de Galicia, en Silleda, o 1 de xullo
Facebook
Twitter
Email
WhatsApp