A delegación episcopal para a Semana Santa de Vigo acaba de anunciar que Mons. Francisco José Prieto, arcebispo de Santiago de Compostela, aceptou a invitación do bispo de Tui-Vigo para ser o pregoeiro que anuncie este ano os actos da Semana Santa viguesa. A lectura do pregón terá lugar na concatedral-basílica de Santa María, ás 19.30 horas, do xoves 14 de marzo.
A elección do pregoeiro non foi fortuíta. O interese do bispo e os seus colaboradores por poñer en valor o sentido relixioso da Semana Santa da nosa cidade propicia a elección de persoas que contribúan coa súa autoridade a ese obxectivo, para dinamizar espiritualmente as manifestacións relixiosas nas parroquias do Concello vigués e impulsar as expresións de fe na semana principal do calendario cristián. Para iso, están a manterse diversas reunións de coordinación cos párrocos da cidade, así como con diversas confrarías e asociacións de fieis, a fin de canalizar adecuadamente eses propósitos.
Ademais da organización do pregón, a delegación para a Semana Santa de Vigo traballa na programación dos distintos actos que conforman esta imprescindible cita do calendario católico.
Sobre Mons. Francisco José Prieto Fernández, arcebispo de Santiago
Mons. Francisco José Prieto (Ourense, 1968) recibiu a orde sacerdotal en xuño de 1993. Desde o 1 de abril de 2023, é arcebispo da arquidiocese de Santiago de Compostela. Previamente, en 2021, foi ordenado bispo auxiliar na catedral de Santiago, polo arcebispo Mons. Julián Barrio. Cursou estudos eclesiásticos no Instituto Teolóxico «Divino Mestre» de Ourense, centro afiliado á Facultade de Teoloxía da Universidade Pontificia de Salamanca (1986-1992). É licenciado en Teoloxía Patrística pola Facultade de Teoloxía da Universidade Gregoriana de Roma (1992-1994) e doutor en Teoloxía Bíblica pola Facultade de Teoloxía da Universidade Pontificia de Salamanca (2008). Na Conferencia Episcopal Española é membro da Comisión Episcopal para as Comunicacións Sociais e da Subcomisión Episcopal para o Patrimonio Cultural.
