Este domingo, 25 de xullo, termina o prazo para inscribirse na II Edición da Escola de Voluntariado organizada por Mans Unidas de Galicia —en colaboración coa deputación da Coruña e a Asociación Raíña Paraíso de Vilasantar—, que ofrece aos mozos un espazo para debater sobre os principais retos sociais e ambientais aos que se enfronta o planeta.
Os mozos e mozas de entre 18 e 35 anos interesados en participar no campamento de voluntariado para a sustentabilidade, que terá lugar nas instalacións da Asociación Raíña Paraíso de Vilasantar desde o 12 ao 15 de agosto, poden inscribirse a través da seguinte ligazón. O custo da inscrición é de 40€ e inclúe o aloxamento, a pensión completa e a contratación do seguro con posibilidade de transporte desde Santiago de Compostela a Vilasantar para quen o necesite.
Durante 4 días, os participantes formaranse nas novas necesidades, a Axenda 2030 das Nacións Unidas e os Obxectivos de Desenvolvemento Sostible a través dun programa de actividades vivenciais e formativas deseñadas para mellorar a comprensión da problemática mundial, participativo e que pretende fomentar o debate.
